PASAMBAHAN KATURUN

PASAMBAHAN KATURUN

 (MINTAK PULANG).

 K.R St.Alamsyah.

Sesudah selesai makan dan minum serta menyantap parabuang (kue-kue) yang dihidangkan, biasanya disambung dengan rokok sebatang dan ngobrol kekiri-kekanan, maka sampailah waktunya untuk pulang. Si alek yang biasanya diwakili oleh orang yang sama dengan yang menyampaikan pasambahan diawal alek tadi akan diminta oleh anggota alek yang lain untuk meminta diri ke si pangka. Pasambahan inipun biasanya ditujukan kepada orang yang sama dari si pangka.

St.Mangkuto : " Angku sutan Alamsyah, ambo manyambah." ( disampaikan dengan

menyusun jari seperti menyembah ke arah St.Alamsyah, dan St.Alamsyah berdiri untuk kemudian menjawab).

St.Alamsyah : " Manitahlah, Sutan Mangkuto".

St.Mangkuto : " Sungguahpun Sutan surang nan ambo sambah, alah sarapek

papeknyolah Niniak mamak, sarato jo silang nan bapangka karajo nan bapokok, nan Sutan baipa bisan, jo urang sumando tampek ambo maantakan sambah. Indak taatok tabilang gala jo sambah ambo muliakan. Indak doh ambo rasonyo malampau malinteh, alah bulek kato dipihak sabalah kamari di ambo tabik pasambahan. Apo nan jadi buah pasambahan dek kami iolah karano diwakatu nan bak kini, kok nan diama alah pacah, nan dimukasuik alah sampai, saiyo pulo dek ado pulo karajo duo-tigo nan mananti, baitu pulo dek niniak jo mamak kok lamo tagak taraso paniang, kok lamo duduak taraso panek, iolah nak maurak selo maayun langkah nak pulang karumah masiang-masiang. Mamintak kami, nak dilapeh jo hati nan suci, jo muko nan janiah. Sakian sambah bakeh Sutan."

 (Cara minta diri yang sangat indah penyampaiannya. Dengan petatah petitih disampaikan kerja yang ini sudah selesai, dan masih ada kerja yang lain, maka pertemuan ini minta diakhiri).

St.Alamsyah : " Alah sampai tu, Sutan Mangkuto?"

St.Mangkuto : " Alah, Sutan".

St.Alamsyah : " Ma, Sutan Mangkuto, sungguahpun Sutan surang nan ambo sambah,

alah sarapek papeknyolah niniak jo mamak, sarato jo tuangku nan dua tigo kadudukan, tampek ambo maantakan sambah. Indak taatok tabilang gala jo sambah ambo muliakan. Indak doh ambo malampau malinteh, dek ambo tabik pasambahan. Ma, St.Mangkuto. Apo nan jadi pasambahan dek Sutan tadi iolah dek karano hari alah barembang patang, kok balayia alah sampai kapulau, kok bajalan alah sampai kabateh, nan diama alah pacah, nan dimukasuik alah sampai, baitu pulo dek ado karajo duo jo tigo, niniak jo mamak sarato alek nak mintak dilapeh jo hati nan suci, jo muko nan janiah, kan iyo sarupo itu, Sutan?"

 (Versi jawaban dari St.Alamsyah ini tidak persis sama dengan apa yang diucapkan oleh St.Mangkuto, tetapi intinya adalah serupa. Sehingga kalau diikuti secara baik, akan terlihat bahwa kedua orang ini mengeluarkan segala kemampuannya untuk membuat pembicaraan sambah manyambah ini tidak menjadi kaku dan monoton).

St.Mangkuto : " Sabana-bananyo tuh Sutan"

St.Alamsyah : " Ma St.Mangkuto. Nan jadi buah panitahan dek sutan tadi tu iolah alah

talingka dipusako, alah pasa nan batampuah. Namun sungguahpun baitu bak pituah urang tuo-tuo, kato surang babuleki, kato basamo bapaiyokan, dek karano kami ado baduo batigo disiko, kok ambo elo jo mupakaik, mananti Sutan sakutiko, laikoh didalam adaik?"

St.Mangkuto :" Ma St.Alamsyah, iyo di Sutan, bapakaikan bana pituah utrang tuo, kok

baitu bialah ambo nanti, asa pintak lai ka balaku, kandak lai ka buliah".

 (St.Alamsyah membawa pembicaraannya itu kedalam kelompok si pangka. Biasanya salah seorang si pangka akan mengatakan minta maaflah dulu kalau ada pelayanan si pangka yang kurang. Pembicaraan ini tidak dilakukan dalam bentuk sambah manyambah).

St.Alamsyah : " Ma St.Mangkuto. Dihari nan tadi minta wakatu ambo sasaat sakutiko

untuk mampaiyo mampatidokan nan jadi buah panitahan Sutan. Saiyo puloh kakasan lai kababari nyo. Namun ado pulo nan takana dek silang nan bapangka karajo nan bapokok, iyolah tantangan duduak jo makan. Kok jujua panjuik, luhak lambang, nan tuo ta katangahkan, nan mudo ta katapikan, iyolah mintak maaf kami silang nan bapangka karajo nan bapokok. Baitu juo tantangan makan jo minum, kok kurang asam garamnyo iyolah sabana minta direlakan jo dimaafkan. Sakian sambah bakeh Sutan."

 (Pelayanan yang kurang tentu tidak mengenakkan bagi alek yang datang. Untuk itu si pangka mintak maaf kalau ada orang tua yang didudukkan ditengah-tengah dan yang muda didudukkan dipinggir. Maksudnya adalah seharusnya yang tua duduk dipinggir ruangan supaya bisa bersandar ke dinding dan yang muda masih kuat untuk duduk ditengah tanpa harus bersandar. Bagitu juga sambal/gulai yang dimakan biasanya adalah masakan dapur rumah itu, kalau kurang enak tentu yang harus minta maaf atas kekurangan ini adalah si pangka).

St.Mangkuto : " Alah sampai tu, Sutan?"

St.Alamsyah : " Alah., Sutan"

St.Mangkuto : " Dihari nan tadi Sutan minta wakatu sasaat sakutiko untuk mampaiyo

mampatidokan parmintaan dari kami nan sabalah kamari ko. Saiyo pulo alah dapek kato nan sapakaik, kakasan lai kababari. Disampiang itu baparmintaan pulo dari silang nan bapangka karajo nan bapokok, tantangan duduak, kok lai nan indak ditampaiknyo, nan diateh ta kabawahkan, nan ditangah ta katapikan, baitu juo tantangan makan, kok lai nan kurang asam garamnyo, nan malimbak dek panuah, nan badakuak dek kurang, mintak dibari maaf. Kan iyo sarupo itu Sutan?"

St.Alamsyah : " Sabana-bana nyo tu, Sutan."

St.Mangkuto : " Ma St.Alamsyah. Sapanjang panitahan Sutan tadi iyolah ambo jawab.

Tapi kok nan parmintaan Sutan ko, kok ambo bao jo mupakaik, jo niniak mamak nan sabalah kamari lai koh dalam adaik Sutan?"

St.Alamsyah : " Ma St.Mangkuto. Iyolah bapakaikan bana dek Sutan adaik nan

diadaikkan, Pailah Sutan jo parundiangan, ambo tagak jo panantian."

 (St.Mangkuto membawa pula pembicaraannya tadi dalam kelompok si alek. Sesudah dapat kata putus bahwa semuanya sudah sesuai dan sudah pada tempatnya maka disampaikanlah oleh St.Mangkuto ke St.Alamsyah.)

St.Mangkuto : " Ma St.Alamsyah. Dihari nan tadi mintak wakatu ambo sasaat sakutiko,

iyolah alah dapek kato nan sapakaik rundiang nan saukua. Kok tantangan duduak iyolah alah ditampeknyo. Nan tuo alah katapi, nan mudo alah katangah.Bak kecek urang gaek, alah di rasuak manjariau, alah dilae lakek atok. Baitu juo kok juadah nan katangah iyolah alah saasam sagaramnyo. Nasi nan sasuok iyo alah kaubek litak, aia saraguak iyo alah paubek hauih. Nan piriang tadinyo tasusun rapi, kini alah centang parenang. Sadonyo alah sarasi. Alah koh sanang hati Sutan? Subaliak daripado itu iyo parmintaan kami tadi juolah nak kami ulang."

St.Alamsyah : " Ma St.Mangkuto. Iyo di Sutan, alah baelo kato jo mupakaik, babao jo

rundiangan. Alah dapek pulo kato nan saiyo, kok nasi sasuok iyo alah kaubek litak, kok aia saraguak alah paubek hauih. Baitu pulo kok duduak iyo alah ditampeknyo. Kan baitu, Sutan?"

St.Mangkuto : " Saiyo-iyo, Sutan"

St.Alamsyah : " Ma St.Mangkuto, tantangan nan katangah dek Sutan tadi iyolah dalam

adaik nan bapakai, alah barih nan bapahek. Sungguahpun baitu, bak kecek urang tuo-tuo, padi indak sakali masak, buruang indak sakali inggok, ado pulo nan takana dikami silang nan bapangka karajo nan bapokok, iyolah tantangan marapulai, nan baantakan. Kok ketek iyolah banamo, kok gadang iyolah bagala, siapo koh namo marapulai dan siapokoh gala baliau. Sakian sambah bakeh Sutan?"

 (Untuk mengatakan bahwa si pangka kelupaan, si pangka menyampaikan melalui petatah-petitih yang memberikan kesan bahwa lupa itu adalah hal yang alamiah. Padi disawah tidak serentak masaknya, burung yang berombongan terbangnya tidak serentak hinggap, selalu ada yang tertinggal. Bagitu juga ingatan si pangka).

St.Mangkuto : " Alah sampai, Sutan?"

St.Alamsyah : " Alah, Sutan."

St.Mangkuto : " Ma St.Alamsyah. Sambah manyambah kapado Allah sajo kito

pulangkan. Baitu juo panitahan Angku tadi, kok dirantang namuah panjang, kok dipunta namuah singkek. Daulu kato basitinah kudian kato basicapek,capek sajo ambo manjawab kaharibaan Angku. Ado pulo nan taraso-raso dihati nan takalang-kalang dimato dek silang nan bapangka karajo nan bapokok, iolah tantangan marapulai. Kok ketek banamo gadang bagala. Sia koh namo ketek jo gala marapulai. Kan baitu, Sutan?"

St.Alamsyah : " Sabananyo tu, Sutan"

St.Mangkuto : " Ma st.Alamsyah. Tantangan itu nan Sutan tanyokan, iyolah dek karano

marapulaiko, baniniak jo bamamak, ambo tanyokan kabaliau tu sabanta, mananti Sutan sakutiko, lai dalam adaik tu Sutan?"

St.Alamsyah : " Basugirolah lah Sutan."

 (St.Mangkuto menanyakan gelar dari marapulai, ke salah seorang keluarga yang terdekat dari marapulai. Biasanya gelar itu sudah disediakan dan tinggal menyampaikan secara resmi di acara ini).

St.Mangkuto : " Ma St.Alamsyah. Dihari nan tadi minta wakatu ambo sasaat sakutiko

untuk mananyokan gala marapulai. Alah dapek pambarinyo, iyolah marapulai ko banamo ……………….(disebutkanlah nama marapulai), kini bagala Sutan ………………. (disebutkan pula gelar yang diberikan oleh mamak marapulai). Disubaliak daripado itu baparmintaan pula niniak jo mamak marapulai, minta gala baliau ko disorakkan ditapian nan langang, dilabuah nan rami. Baitu juo, kok iyo nan marapulaiko umua baru sataun jaguang, darah baru satampuak pinang, kok kabukik samo dibao mandaki, kalurah samo dibao manurun, Sakian sambah, Sutan."

 (St.Mangkuto mewakili keluarga marapulai, menitipkan marapulai kekeluarga anak daro, supaya dibawa sama-sama sehilir semudik dalam kehidupan kekeluargaan ini.)

St.Alamsyah : " Ma St.Mangkuto. Iyolah dek pambari , tantangan namo marapulai yaitu

…………………….(nama marapulai) nan kini bagala Sutan ………………(gala marapulai). Kok baitu, iyolah kok sorak lah kalampauan, bisiak lah samo kadangaran, bialah nak kami imbaukan dilabuah nan gorong di tapian nan rami. Saiyo pulo nan marapulaiko, iolah nak kami bao saayun salangkah, kok tatilantang samo minum aia, kok tatungkuik samo makan tanah, Kok utang sapambayaran, piutang satarimo. Baitu bana dikami tu, Sutan, Alah koh sanang hati Sutan?"

 (St.Alamsyah mewakili keluarga anak daro menyampaikan pula bahwa marapulai ini akan diperlakukan lebih dari yang diharapkan oleh keluarga marapulai. Bukan hanya dibawa kebukit dan kelembah saja, sampai-sampai hutang pun sama-sama dibayar).

St.Mangkuto : " Ma St.Alamsyah. Kok itu nan Sutan sabuik iyolah sabana sajuak dalam

hati, lah sanang kiro-kiro mandangakannyo. Nan kok baitu, namonyo lah sampai kito kaujuang mah, Sutan. Baliak pulolah kapangka, parmintaan kami tadi nak dilapeh jo hati nan suci jo muko nan janiah tadi juolah panuahi. Sakian, Sutan."

St.Alamsyah : " Ma St.Mangkuto, bak kecek urang gaek, ditarah indak tatarah, ditabeh

juo jadinyo. Ditagah indak tatagah, dilapeh juo jadinyo. Baapo lai Sutan, kok iyo baitu pintak Sutan, kami lapeh malah jo hati nan suci, jo muko nan janiah. Baparantian malah kito."

St.Mangkuto : " Dek pintak alah balaku kandak alah buliah, Alhamdulillah panyudahi,

Sutan. Samo-samo mambaruikkan tangan kamuko sajo awak Sutan.

 Dengan demikian selesailah sudah acara sambah manyambah minta pulang dirumah anak daro sesudah selesai makan dan mendoa selamat.

Cobolah inok manuangkan.

KASIH IBU SAPANJANG JALAN, SAYANG ANAK SAPANJANG PANGGALAN.

 

Wahai Anakku...

Katiko kami lah samakin tuo, Kami baharok kalian mamahami sarato mampunyoi kasabaran untuk kami,suatu katiko kami mungkin mamacahkan piriang,atau menumpahkan gulai diateh meja, karano pancaliaan kami lah bakurang,kami harokan kalian indak bangih ka kami, sabab urang tuo2 tu paibo hati ato sensitif kecek urang,,,salalu maraso basalah katiko suaro kalian takareh.

Katiko pandangaran kami samakin mamburuak, dan kami indak bisa mandanga apo nan kalian pakecekan,kami harok kalian indak maimbau kami “pakak!"tolongsen diulang apo nan kalian kecekan ato manulihno dikarateh.

Maaf,… maafkan kami …. Karano kami lah samakin tuo.

Katiko lutuik kami mulai lamah,

Kami harok kalian mamiliki kasabaran untuk mambantu kami jago, Sabagaimano kami salalu basaba maaja kalian bajalan wakatu masih kicik-kicik dulu,Kami mohon janlah bosan jo kami, ndak ado tampek kami mintak tolong lai do.

Katiko kami lah acok maulang-ulang kecek, saroaman jo kasek rusak, kami harok kalian taruihlah mandangakan kami, tolong jan mencameehkan kami, taibo hati kami, atao janlah bosan mandangakan kami, Apokoh lain takana di kalian katiko kalian masih kaciak-kacik dulu, mintak lambuang-lambuang ? Kalian mamintakno baulang-ulang sampai kalian mandapekan apo nan kalian ingikan.

Maafkan kami wahai anak-anak kami,... katiko badan kami lah babaun…

Babaun sarupo urang nanlah tuo…..

Kami mohon, janlah mamaso kami untuk mandi, badan kami lah lamah sarato lameh.....

Orang tuo murah sakikno karano dingin, murah masuak angin karano rentan jo dingin.

Kami harok walaupun kami lah kumuah tapi janlah mambuek kalian marasa jajok sarato jagan,

Laikoh takana di kalian, katiko kalian kacik dulu indak amuah mandi ?,,,, kami taruih mangaja kalian untuk dimandian karano badan kalian lah bakubang lunau….

Kami harok kalian bisa basaba jo kami,…

Katiko kami lah mulai rewel atao genyeh karano itu sarono bagian dari kalakuan urang tuo-tuo,,, kalian akan tau kalau kalian lah tuolo  isuak….

Kalau kalian lai bawaktu luang, Kami arokan kito bisa bacarito, Dak paralu lamo-lamo doh, tolonglah luangkan wakatu kalian sabanta….

Kami taruih kalian tinggaan sahinggo kami ndak ado tampak untuk mancaritoan parasaian,… kami tau kalian sibuk jo karajo, Walaupun kalian ndak tatarik jo carito kami, Kami mohon agiahlah kami wakatu untuk basamo-samo jo kalian cacah,

Indakkoh takana di kalian katiko kalian kaciak dulu ? Kami salalu mandangakan carito kalian tantang pamainan kalian, padahal kami ndak mangarati, tapi kami dangaan juo,… 

Wahai anak-anak kami….

Katiko saatno tibo…..

Kami hanyo bisa tatilantang, sakik dan sakik…

Kami baharok mudah-mudahan kalian lai mampunyoi kasabaran untuk marawaek kami.

Maaf.......maaf kan kami wahai anak-anakku…

Kalau kami lah acok maranang di kasua atau mungkin lah acok bapeteh-petehsen kaluano dilantai rumah kalian nan bakilek,,,, tolonglah basaba marawaek kami, itu tandono hiduik kami ndak kalamo lai dudo,… Disaat-saat tarakhir dalam hiduik kami, Kami mungkin ndak kabatahan lamo lai….

Katiko wakatu kamatian kami lah datang,…

Kami baharrok kalian mamacik an tangan kami,.  Sarato mambarikan kekuatan untuak kami maadok I kamatian,…. dan injanlah kalian khawatir, katiko kami batamu jo Sang Pancipta,…

Kami akan bisiak an ka Tuhan Allah Swt. untuak salalu membarikan barkah ka kalian,..

karano kalian mancintoi Ayah jo Ibu kalian... dan injanlah kalian marato i kapaian kami,…

karana ndak ado gunono lai,… nan paralu kami harok an toloanglah do’a kami,…

karano Allah lah bajanji, do’a kalian akan malapangkan kami…….

Tarimo kasih karano kalian lai basaba manjago kami,…

Insya Allah, Allah akan mambaleh dari arah nan ndak kalian sangko-sangko,

Karano ka Ikhlasan kalian,…..

Dan kami tatap akan mancintoi kalian jo kasiah sayang nan malimpah……

Ibu & Ayah

PASAMBAHAN BATUNANGAN

Oleh : Faisal Dt. Indo Nan Panjang

Sutan Batuah

Ambo Sutan Kayo

Dimuliakan Tuah jo Pasambahan

Rancak

Sungguahpun ka Tuah tibonyo nak sarapeknyolah Rang Gaek salingka duduak sarato Dunsanak bakarapatan,
Sambah manyambah kito pulangkan kapado Allah, salawat kapado Nabi lai nan kato sajo kito pakatokan.

Apo nan kamanjadi buah kato kinitu, maagak diaji kito nan partamu cako jalannyo baranti katonyo basudah kauik abih pancuang putuih bajalan baranti kato basudah, lai dihari nan kini di gunjai nan bauleh disuri nan batuladan diadat nan bapakai dicupak nan baisi tantu arekko bapamacik taguahko bapangajang kok tali dapek diirik kok tambang dapek diasak ka apuang-apuang di lauik ka tungkek-tungkek di darat, kok kaciak namoi tando kok gadang namoi ikatan lai diadat nan katangah nak mintak ditarimo suko goah dek karano rumah baujuang bapangka duduak nak baiyo tagak nak baramuah Tuah

Sampai Kayo

Sampai

Maanyo Kayo

Ambo Tuah

Sabalun kato bajawab gayuang basambuik baiyo sapatah dulu Kayo

Rancak Tuah

Kayo !

Ambo Tuah

Dikumbalikan Pasambahan Kabakeh Kayo

Kumbalikanlah Tuah

Sungguahpun ka Kayo kumbalinyo Nak sarapeknyolah Rang Gaek salingka duduak sarato dunsanak bakarapatan, dibaliak-baliak bak mamanggang di ulang-ulang bak manyapuah lai nan kato Kayo Jua nan kadiamba Gadang dianjuang tinggi apo nan kato Kayo cako tantu Sambah manyambah kito pulangkan kapado Allah, salawat kapado Nabi lai nan kato sajo kito pakatokan.
Apo nan kamanjadi buah kato kinitu, magak maagak diaji kito nan partamu cako jalannyo baranti katonyo basudah kauik abih pancuang putuih bajalan baranti kato basudah, lai dihari nan kini di gunjai nan bauleh disuri nan batuladan diadat nan bapakai dicupak nan baisi tantu arekko bapamacik taguahko bapangajang kok tali dapek diirik kok tambang dapek diasak ka apuang-apuang di lauik ka tungkek-tungkek di darat, kok kaciak namoi tando kok gadang namoi ikatan lai diadat nan katangah nak mintak ditarimo suko goah dek karano rumah baujuang bapangka duduak nak baiyo tagak nak baramuah Tuah kan baitu bana tu Kayo

Io sabana baitu Tuah

Kayo

Ambo Tuah

Dek kito nan baadok batunggalan bana sasuai paham saukua tapi samantangpun baitu lamak siriah lego carano lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo bao kato Naro tu jo mupakat Naro mananti baanyo kolah.

Sampai Tuah

Sampai

Samulo Kato kadianta kabakeh Tuan io bana nak sarangkai bak labu nak satali bak papeh kateh nak sapucuak kabawah nak saurek kato io nak tabao jo mupakat nana tu Tuan.

Ambo kamambao kato jo Mupakat Kayo mananti lai kasaba ?

Sakiro kiro Tuah

Nan kito baa Kayo

Baranti

MAMBAO BAIYO

Muncak !

Ambo Tuan Tuah

Barudiang jo Muncak sapatah

Rancak Tuan Tuah

Sungguahpun ka Muncak tibonyo nak sarapeknyolah Rang Gaek salingka duduak sarato Dunsanak bakarapatan,
Sambah manyambah kito pulangkan kapado Allah, salawat kapado Nabi lai nan kato sajo kito pakatokan.
Apo an kamanjadi buah kato ka Muncak kinitu satantangan di bisiak nan kadangaran imbau nan kalampauan maagak nan ka buah barinao iko nan kadijapuikkan ka Muncak kinigo.

Sampai Tuan

Sampai Muncak

Sabalun kato ba jawab gayuang batangkih baiyo sapatah tuah

Rancak

Kayo

Ambo Muncak

Dikumbalikan Parundiangan ka Tuah

Rancak

Sungguapun Ka Tuah tibono nak arapeknyolah Rang Gaek salingka Duduak sarato Dunsanak karapatan, dibaliak-baliak bak mamanggang diulang ulang bak manyapuah nan diTuah juo nan ka diamba gadang danjuang tinggi, apo nan kato Tuah cako tantu sambah manyabah dipulangkan kapado Allah , salawat kapado Nabi lai nan kato sajo kito pakatokan, apolah nan kamanjadi buah kato di Tuah tu kini satantangan di bisiak nan kadangaran imbau nan kalampauan, maagak nan ka buah barinyo bajapuikkan ka Muncak kan baitu bana Tuah

Io sabana baitu Muncak

Tuah

Ambo Muncak

Dek kito nan baadok batunggalan bana sasuai paham saukua tapi samantangpun baitu lamak siriah lego carano lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo bao kato Tuah tu jo mupakat Tuah mananti baanyo kolah.

Samulo Kato kadianta kabakeh Muncak io bana kailia nak sarangkuah dayuang kamudiak nak satumpu galah, kato io nak tabao jo mupakat bana tu Muncak.

Ambo mambao kato jo mupakat Tuah mananti lai kasaba

Sakiro-kiro Muncak

Nan kito Tuah

Baranti

Tuah

Ambo Muncak

Dihari nan cako Tuah ambo sabakan manuruik Adat manauang manuruik Undang samantaro ambo manjapuikkan nan ka buah barinyo ka Urang Gaek salingka Duduak sarato Dunsanak, baa dek Urang Gaek sarato dunsanak karapatan ndak sasak bintang di langik ndak gambuang lukah di aia tumah tiok kandak tiok buliah tiok pintak tiok balaku, lah ado nan kabuah barinyo dek baliau, dek baliau baanta ka Ambo dek Ambo kabaanta ka bakeh Tuah Alah koh rancak dianta Tuah ?

Nan dijapuik Muncak

Apolah nan kaantanyo kinitu satantangan dibisiak nan kadangaran imbau nan kalampauan , bapambarianlah Tuah disinan nan kami disiko tinggi maanjuang gadang maamba, itulah nan kabuah barino tu Tuah

Sampai Muncak

Sampai Tuah

Dihari nan Cako Ambo Muncak sabakan manuruik adat manaung manuruik Undang samantaro muncak manjapuikkan aia nan janiah sayak nan landai kaakeh Rang Gaek salingka duduak sarato Dunsanak , tumah lah dapek nan kabuah barinyo dek baliau, dek baliau baanta kamuncak, dek Muncak baanta kabekehambo, alah nan kaantanyo kinitu satantangan, dibisiak nan kadangaran imbau kalampauan, bapambarianlah Tuah disinan nan kami disiko tinggi maanjuang gadang maamba , kan baitu banatu Muncak ?

Io sabana baitu tuah

Muncak !

Ambo Tuah

Dek karono panehko bapuhun ujanko barasa disagoan roan ka ureknyo kato ke nan tabik baako baitu Muncak ?

Nak tampak pasa bakeh bamalam, bateh tampek baranti, rantiang tampek enggok, pulau tampek banang, iolah rancak rotan disagokan kaurekyokato ke nan tabik Tuah.

Nan kito Muncak

Baranti Tuah

Kayo

Ambo Tuah

Dikumbalikan Pasambahan kabakeh Kayo

Rancak Tuah

Dihari nan cako Kayo Ambo sabakan manuruik adat manaung manuruik undang samantaro ambo mancarikan aia nan janiah sayak nan landai kabakeh rang gaek sarato dunsanak , ruponyo dak gambuang lukah diaia ndak sasak bintang di langik tiok kandak tiok bulaku tiok pintak tiok buliah pucuak dicinto ulam tibo sumua dikali aia tabik tumah lah ado nan kabuah barinyo di balau, di baliau baanta kaambo di ambo kabaanta ka Kayo, alahko rancak dianata Kayo ?

Rancak Tuah

Apolah nan kaantanyo kinitu tantangan diadat Kayo nan katangah lah gunjai nan bauleh lah suri nan batuladan adat lamo pusako usang alah batarimo suko jano baliau limbak nan dari pado itu manuruik kato hati diateh tabangko batimbalan kalo-kalo jan putuih titian jan lapuak sambah lalu sal;am kumbali nan kumbalinyo io nak batarimo suko pulo koah ikolah nan kabuah barinogo Kayo ?

Sampai Tuah

Sampai Kayo

Sambah lalu salam kumbali nan kumbalinyo lah batarimo suko pulo kan Tuah

Tuah

Ambo Kayo

Dek kandak lah samo buliah pintak lah samo balaku lah manyanagkan ati rasonyo Tuah,

Nan kito Tuan

Baranti Kayo

Sutan Batuah

Ambo Sutan Kayo

Nak Kabarundiang jo Tuah sapatah lai.

Sampaikanlah Sutan Kayo

Nan paja kanlah batunangan , dimalam nan samalam nangko tiok-tiok nan dimukasuik alah sampai nan dama alah pacah , bana nan kadianta ka bakeh Kayo kiniko silang nan bapangka karajo nan bapokok, koknyo barueh nak tampak bukunyo, koknyo laweh nak tampak tapinyo, koknyo panjang nak tampak ujuangnyo, diharinyo nan baikak kotikonyo nan elok ikolah bana nan kadianta ka Kayo kinikoah .

Sampai Tuah

Sampai

Dek karano Ambo lai duduak jo niniak mamaksarato ibu jo bapo ambo jaopuikkan nan ka buah barinyo Tuah mananti baanyo kolah

Sampai Kayo

Samulo kato kadianta ka Kayo kok mamaek nak tibo dibarih kok bakato nak tibo di alua kato nak tabao jo mupakat tu Kayo

Nan kito kayo

Baranti

Tuah

Ambo Kayo

Dikumbalikan parundiangan ka Tuah

Rancak

Dihari nan cako Tuah mananti Ambo mambao kato baiyo jo niniak mamak , dunsanak sarato ibu jo bapo, lah dapek nan kabuah barino dek baliau baanta kaambo dek ambo kaba anta ka Tuah alahkoh rancak dianta Tuah ?

Nan di japuik Kayo

Apolah nan kaantanyo kinitu satantangan di arinyo nan baiak kutikonyo nan elok, manti lai kabarulang iko nan kabuah barinyo ko Tuah

Sampai Kayo, dek karano kandak lah buliah pintak lah balaku lah manyanangkan hati rasonyo Kayo
Nan kito Tuah
Baranti

ALAM TAKAMBANG JADI GURU

(bagian III)

SIMAKLAH PULO CANDONYO ANAU

Tumbuah tak rago urang tanam.

Barabuik sigaek nak mamanjek.

Indak suatu nan tabuang.

Batangnyo manganduang sagu.

Makanan urang sa nagari jo kudo-kudo malamakkan,

Ruyuang diambiak ka pincuran,

Kok dikabuang dibalah-balah,

Elok ka kasau jo kalantai,

Ka paga nan rancak bana.

Daun nan tou jadi atok

Nan pucuak ka daun rokok

Lidih disusun jadi sapu.

Ijuaknyo elok ka tali,

Saga pun banyak kagunoan.

Buah lamak nirunyo manih.

Dimasak jadilah gulo,

Diparam tuak namonyo,

Kok rasan itulah cuko.

Kampai-pun ka miang palapahnyo,

Tapakai ka rabuak api.

USAH BAK CANDO BIO-BIO

Bagagang mamanjek samak,

Biaso tumbuah di baluka

Roman saujuik kacang paga.

Buahnyo baduyun-duyun,

Kulik bakilek kuniang ameh haluih bak bulu anak kuciang,

Itulah miang sabananyo.

Salain banamo bio-bio kacang miang namonyo juo

Jarang lah urang nan tak tau.

Dek inyo bagagang panjang,

Bio-bio manjala tanah,

Supayo tagak bak urang pulo

Tapaso malilik batang bagantuang ka rantiang kayu.

Banyak kacang pakaro kacang,

Kacang miang paliang manggata.

Gata dek miang bio-bio taseso sabatang tubuah,

Jantuang lah mintak gawuik pulo.

IDUIK PISANG JADI PIDOMAN

Hiduik hanyo sakalai joak
Umua nan tidak panjang amek
Bapantang mati mangarisiak
Sabalun buah mangalupak
Walau jantuang nyo ka ta ulua

Pagi di pancuang patang tumbuah
Dipapek bataruak juo
Cako rogek kini badaun
Paneh bamusim tak nyo layua
Dek ribuik haram tabokekan
Sampai maurai bongo mandak

Tumbuah isuak babuah labek
Manyirah sabalik tandan
Dimakan Urang sanagari.
Buruang jo pipik barasaki
Mambari guno bakuliliang

Tarago indak disintuah
Inyo katumbang rabah surang
Rila mati tunduak ka bumi
Umua usai tugas salasai
Jariah indak dikana lai
Bia nan satu manilainyo

(Sebentar tapi berkesan, sekali penuh kenangan)
(Oleh : Yus. Dt. Parpatiah dalam album Pitaruah Ayah Untuak Calon Pangulu)

PASAMBAHAN KA MAKAN

PASAMBAHAN KA MAKAN

Oleh : Faisal S.Pd Dt.Indo nan Panjang.

Naro !
Ambo Tuan Malin
Barundiiang sapatah Naro
Rancak Tuan
Sungguahpun ka Naro tibonyo nak sarapeknyolah Rang Gaek salingka duduak sarato Dunsanak bakarapatan,
Sambah manyambah kito pulangkan kapado Allah, salawat kapado Nabi lai nan kato sajo kito pakatokan.
Apo nan kamanjadi buah kato kinitu, maagak dihari nan kapatang tibonyo di Silang Nan Bapangka Karajo nan Bapokok Manaruah niek jo nasa, apolah nan kamanjadi niek jonasa tantu kok siriahnyo bacabiak pinangnyo bagatok, kulansiang lapeh padah talayang kabakeh Urang Gaek sarato dunsanak, baa dek Rang Gaek jo Dunsanak dihari nan sahari nagko kok janji batapati kara bamuliakan, tumah labuah nan panjang lah baturuik, halaman nan laweh lah bapijak, janjang takanak lah batingkek, bandua tarantang lah batapiak, kini lah hadir tangah rumah. Kok duduak lah saangek lapiak, maisok lah sapadam baro, mangunyah lah sakariang sapah. Pun baanyo kinilai, lai dijoaro sipangka nan lah bacapek kaki baringan tangan nan pandai maatak maatunkan maagak maagiahkan kok bilangannyo cukuik susunan sampai, juadah nan diatap di kumbuak nan tabatua kok ai taganang nak bailiakan kapa tatumbuak bakelokkan karano rumah baujuang bapangka duduak nak baiyo tagak nak baramuah jo Naro
Sampai Tuan
Sampai
Maanyo Tuan
Ambo Naro
Sabalun kato bajawab gayuang basambuik baiyo sapatah dulu Tuan.
Rancak Naro
Tuan Malin !
Ambo Naro
Dikumbalikan Pasambahan Kabakeh Tuan Malin
Kumbalikanlah Naro
Sungguahpun ka Tuan kumbalinyo Nak sarapeknyolah Rang Gaek salingka duduak sarato dunsanak bakarapatan, dibaliak-baliak bak mamanggang di ulang-ulang bak manyapuah lai nan kato Tuan Juo nan kadiamba Gadang dianjuang tinggi apo nan kato Tuan cako tantu Sambah manyambah kito pulangkan kapado Allah, salawat kapado Nabi lai nan kato sajo kito pakatokan.
Apo nan kamanjadi buah kato kinitu, maagak dihari nan kapatang tibonyo di Silang Nan Bapangka Karajo nan Bapokok Manaruah niek jo nasa, apolah nan kamanjadi niek jonasa tantu kok siriahnyo bacabiak pinangnyo bagatok, kulansiang lapeh padah talayang kabakeh Urang Gaek sarato dunsanak, baa dek Rang Gaek jo Dunsanak dihari nan sahari nagko kok janji batapati kara bamuliakan, tumah labuah nan panjang lah baturuik, halaman nan laweh lah bapijak, janjang takanak lah batingkek, banduatarantang lah batapiak, kini lah hadir tangah rumah. Kok duduak lah saangek lapiak, maisok lah dsapadam baro, mangunyah lah sakariang sapah. Pun baanyo kinilai lai lai dijoaro sipangka nan lah bacapek kaki baringan tangan nan pandai maatak maatunkan maagak maagiahkan kok bilangannyo cukuik susunan sampai, juadah nan diatap di kumbuak nan tabatua kok ai taganang nak bailiakan kapa tatumbuak bakelokkan karano rumah baujuang bapangka duduak nak baiyo tagak nak baramuah jo Naro kan baitu banatu Tuan
Io sabana baitu Naro
Tuan Malin
Ambo Naro
Dek kito nan baadok batunggalan bana sasuai paham saukua tapi samantangpun baitu lamak siriah lego carano lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo bao kato Tuan tu jo mupakat Tuan mananti baanyo kolah.
Sampai Naro
Sampai Tuan
Samulo Kato kadianta kabakeh Naro io bana, kailia nak sarangkuah dayuang ka mudiak nak satumpu galah kato io nak tabao jo mupakat bana tu Naro.
Ambo kamambao kato jo Mupakat Tuan mananti lai kasaba ?
Sakiro kiro Naro
Nan kito baa Tuan
Baranti Naro
MAMBAO BAIYO
Lenggang !
Ambo Tuan Naro
Barudiang jo Lenggang sapatah
Rancak Tuan Naro
Sungguahpun ka Lenggang tibonyo nak sarapeknyolah Rang Gaek salingka duduak sarato Dunsanak bakarapatan,
Sambah manyambah kito pulangkan kapado Allah, salawat kapado Nabi lai nan kato sajo kito pakatokan.
Apo an kamanjadi buah kato ka Lenggang kinitu satantangan di bisiak nan kadangaran imbau nan kalampauan maagak nan ka buah barino iko nan kadijapuikkan ka Lenggang kiniko.
Sampai Naro
Sampai Lenggang
Sabalun kato ba jawab gayuang batangkih baiyo sapatah Naro
Rancak
Tuan Naro
Ambo Lenggang
Dikumbalikan Parundiangan ka Tuan Lenggang
Rancak
Sungguapun Katuan Lenggang tibono nak arapeknyolah Rang Gaek salingka Duduak sarato Dunsanak karapatan, dibaliak-baliak bak mamanggang diulang ulang bak manyapuah nan diTuan juo nan ka diamba gadang danjuang tinggi, apo nan kato Tuan cako tantu sambah manyabah dipulangkan kapado Allah , salawat kapado Nabi lai nan kato sajo kito pakatokan, apolah nan kamanjadi buah kato di Naro tu kini satantangan di Imbau nan kalampaan bisiak nan kadangaran maagak nan ka buah barinyo bajapuikkan ka Lenggang kan baitu bana Naro
Io sabana baitu Lenggang
Naro
Ambo Lenggang
Dek kito nan baadok batunggalan bana sasuai paham saukua tapi samantangpun baitu lamak siriah lego carano lamak kato balega bunyi nan bana kato baiyo nan rajo kato mupakat, dek karano rang gaek lai samo diadok ambo bao kato Tuan tu jo mupakat Tuan mananti baanyo kolah.
Samulo Kato kadianta kabakeh Lenggang io bana kailia nak sarangkuah dayuan kamudiak nak satumpu galah, kato io nak tabao jo mupakat bana tu Lenggang.
Ambo mambao kato jo mupakat Naro mananti lai kasaba
Sakiro-kiro lenggang
Nan kito Naro
Baranti
Naro
Ambo Lenggang
Dihari nan cako Naro ambo sabakan manuruik Adat manauang manuruik Undang samantaro ambo manjapuikkan nan ka bua barinyo ka Urang Gaek salingka Duduak sarato Dunsanak, baa dek Urang Gaek sarato dunsanak karapatan ndak sasak bintang di langik ndak gambuang lukah di aia tumah tiok kandak tiok buliah tiok pintak tiok balaku, lah ado nan kabuah barinyo dek baliau, dek baliau baanta ka Ambo dek Ambo kabaanta ka bakeh Naro Alah koh rancak dianta Naro ?
Nan dijapuik Lenggang
Apolah nan kaantanyo kinitu satantangan di Aia taganang nak bailiakan biduak tatumbuak nak bakelokkan, bapambarianlah Naro disinan nan kami disiko tinggi maanjuang gadang maamba, itulah nan kabuah barinotu Naro
Sampai lenggang
Sampai Naro
Dihari nan Cako ambo Lenggang sabakan manuruik adat manaung manuruik Undang samantaro Lenggang manjapuikkan aia nan janiah sayak nan landai kaakeh Rang Gaek salingka duduak sarato Dunsanak , tumah lah dapek nan kabuah barinyo dek baliau, dek baliau baana ka Lenggang, dek Lenggang baanta kabekeh ambo, alah nan kaantanyo kinitu satantangan, aia taganang nak bailiakan, biduak tatumbuak nak bakelokkan, bapambarianlah Naro disinan nan kami disiko tinggi maanjuang gadang maamba , kan baitu banatu Le3nggang ?
Io sabana baitu Naro
Lenggang ?
Ambo Naro
Dek karono panehko bapuhun ujanko barasa disagoan roan ka ureknyo kato ke nan tabik baako baitu Lenggang ?
Nak tampak pasa bakeh bamalam, bateh tampek baranti, rantiang tampek enggok, pulau tampek banang, iolah rancak rotan disagokan kaureknyo kato ke nan tabik Naro
Nan kito Lenggang
Baranti Naro
Tuan Malin
Ambo Naro
Dikumbalikan Pasambahan kabakeh Tuan Malin
Rancak Naro
Dihari nan cako Tuan Ambo sabakan manuruik adat manaung manuruik undang samantaro ambu mancarikan aia nan janiah sayak nan landai kabakeh rang gaek sarato dunsanak , ruponyo dak gambuang lukah diaia ndak sasak bintang di langik tiok kandak tiok bulaku tiok pintak tiok buliah pucuak dicinto ulam tibo sumua dikali aia tabik tumah lah ado nan kabuah barinyo di balau, di baliau baanta kaambo di ambo kabaanta ka Tuan, alahko rancak diaata Tuan ?
Rancak Naro
Apolah nan kaantanyo kinitu tantangan aia taganang nak bailiakan biduak tatumbuak nak bakelokkan , rasonyo kandak lai kabuliah pintak lai kabalaku , lah taracak dikudo lah tatampuah di jalan , titiak ujan di langik bumi lah suko manarimo , ikolah nan kaantanyo Tuan ?
Sampai Naro
Sampai Tuan
Dek karano pintak lah buliah kandak labalaku alah sanang rasonyo ati Naro
Jo Bismikllah sajo kito muloi Tuan
Nan kito baa Naro
Baranti Tuan

mampasilahkan makan

I.                  MEMPERSILAKAN MAKAN

(K.R St.Alamsyah)

Dalam upacara adat di Minangkabau pada umumnya dan di Koto Gadang khususnya selalu dijumpai acara yang secara umum disebut sebagai acara "sambah manyambah". Acara ini dilakukan dalam upacara adat yang merupakan pembicaraan antara si pangka (yang punya acara tersebut) dengan si alek (tamu pada acara tersebut). Si pangka akan menyampaikan permasalahan yang akan dilakukan pada acara tersebut dan si alek akan mengolah dan menyampaikan tanggapan atas apa yang disampaikan si pangka. Semuanya disampaikan dalam tutur kata yang terjalin dengan indah dan disertai dengan petatah petitih dalam dialek Minangkabau.
Apabila diperhatikan apa yang disampaikan oleh pembicara dalam acara sambah manyambah ini terlihat bahwa kata-kata yang disampaikan ini tersusun dengan rapi dan mengandung pengertian yang dalam, sehingga makin jelas bagi kita betapa tingginya budaya yang kita miliki ini. Sayangnya tidak banyak diantara kita yang betul-betul menikmati dan memahami apa yang terjadi dalam acara sambah manyambah ini.
Dalam tulisan ini kami ingin menyampaikan pandangan tentang apa yang kami ketahui tentang sambah manyambah ini. Tentu saja penyampaian ini bukanlah analisa dari seorang yang sangat memahami adat (ahli adat) karena kami bukanlah seorang yang memahami adat secara baik dan betul. Yang akan kami sampaikan ini adalah pemahaman kami tentang acara sambah manyambah yang kami ketahui sebagai seorang putra Koto Gadang yang besar dikampung dan beberapa kali terlibat dalam acara sambah manyambah ini. Kalau analisa kami ini tidak berkenan dihati pembaca yang lebih memahami adat, (kami sangat menyadari hal ini), mungkin dapat dibalikkan fakta ini menjadi : " inyo nan gadang dikampuang dan pernah pulo ikuik sambah manyambah dikampuang cuma sakitu pemahamannyo, apolagi nan ……………".
Sambah manyambah , adalah acara adat yang sangat menentukan dalam suatu proses adat. Penyampaian tentang acara yang akan dilakukan diucapkan secara formal kepada yang hadir dan si alek akan menanggapinya pula secara formal. Tergantung kepada acaranya yang bermacam-macam, bisa malapeh marapulai, mampasilakan makan, minta diri kapulang, manjapuik/malapeh ninik mamak dan lain sebagainyo, maka cara penyampaian dan apa yang diucapkanpun berbeda pula.
Untuk selanjutnya kami ingin membicarakan acara sambah manyambah dalam suatu pesta perkawinan. Untuk ini kami mulai dengan sambah manyambah dalam acara dirumah anak daro sesudah marapulai sampai dan para tetamu sudah duduk menghadapi hidangan yang tersedia.
(Akad nikah bisa dilakukan pada waktu itu atau sebelumnya. Tidak ada acara adat formal yang menyertai upacara akad nikah, karena ini adalah acara yang dipimpin oleh angku kadi/pengulu. Sesudah akad nikah selesai dan diiringi dengan do’a maka sipangka akan mengetengahkan nasi. Samba dan kue–kue parabuang biasanya sudah terletak sebelum tamu menaiki rumah.)
Sesudah selesai menghidangkan nasi, maka si pangka, dalam hal ini diwakili oleh urang sumando dari suku anak daro menyampaikan pasambahan yang ditujukan kepada salah seorang wakil dari si alek yang biasanya sudah ditentukan secara aklamasi oleh yang hadir diruangan itu.
(Disinilah satu-satunya tempat bagi seorang urang sumando untuk memperlihatkan kehebatannya karena seperti kita ketahui, di rumah istrinya seorang laki-laki di Minangkabau tidak mempunyai peran apa-apa, "urang sumando, abu diateh tunggua")
Pasambahan ini dimulai dengan menyapa orang-orang yang hadir yang dihormati secara adat.
St.Alamsyah (si pangka) : " Ma Angku Datuak Marajo, ambo manyambah. (tangan
St.Alamsyah dirapatkan didepan dadanya, seperti menyembah raja, dan diarahkan ke tempat e.Dt.Marajo duduk). Angku Dt.Palindih ambo manyambah. (tangan seperti tadi kembali) Angku Dt.Palimo ambo manyambah. Kasudahan sambah ka angku Sutan Mangkuto. ( berarti untuk seterusnya yang akan mewakili si alek adalah St.Mangkuto).
St.Mangkuto : " Manitahlah St.Alamsyah.
 (kalau diperhatikan apa yang disampaikan St.Almsyah, yaitu St.Alamsyah manyambah ka St.Mangkuto, hakikatnya St.Alamsyah menempatkan St Mangkuto diposisi sebagai raja yang disambah, dan kemudian St.Mangkuto menjawab, "manitahlah ", inipun meletakkan posisi St.Almsyah sebagai raja yang memberikan titahnya, bukannya dijawab "manyambahlah". Suatu penyampaian sopan santun yang hanya bisa dinikmati kalau kita memahami falsafahnya.)
St.Alamsyah : " Sungguahpun angku St.Mangkuto surang nan ambo sambah, alah
sarapek papeknyolah niniak mamak nan gadang basa batuah, imam khatib tuangku nan duo-tigo kadudukan, sarato jo dunsanak nan tahadia ditangah rumah nangko, tampek ambo maantakan sambah. Indak taatok tabilang gala, jo sambah ambo muliakan. Indaklah ambo maraso malampau malinteh, dek ambo tagak saujo salapeh sipangkalan, di ambo tabik pasambahan.

(penyampaian ini memberikan kesan bahwa pembicaraan antara St.Alamsyah dan St.Mangkuto ini sebenarnya melibatkan seluruh orang yang hadir diruangan tempat acara itu berlangsung. Dan penunjukan St,Alamsyah sebagai pembicara adalah suatu kesepakatan bersama. Selanjutnya St.Alamsyah akan menyampaikan apa yang menjadi keinginan si pangka.)
Ma St.Mangkuto. Dihari nan sahari nangko, nan namonyo hari baiak kutiko elok, silang nan bapangka nak malapeh niaik duduak basamo jo angku-angku. Saiyo pulo kiniko janjang nan alah batingkek, bandua nan alah batapuak, duduak katangah rumah nangko. Nan iyo pulo di silang nan bapangka karajo nan bapokok, iyolah alah disuruah pulo nan capek kaki nan ringan tangan untuak mahedangkan katangah. Samuntalah pulo iyolah bak kato urang tuo-tuo, kok sambahyang dibari bawakatu, kok makan dibari bakutiko, iolah rasonyo alah tibo pulo kini kutiko makan. Pandang jauah kok dilayangkan, pandang dakek kok ditukiakkan, iyolah dihedangan nan katangah.
Bapamintaan pulo kami dari silang nan bapangka karajo nan bapokok, ka alek nan tahadia ditangah rumahko, kok hidangan nan katangah mintak diparenai. Sakian sambah bakeh angku".
St.Mangkuto : " Alah sampai tu Sutan?"
StAlamsyah : " Alah, Sutan".
St.Mangkuto : " Ma. St.Alamsyah. Sungguahpun Sutan surang nan ambo sambah alah
sarapek papeknyolah Sutan nan baipa-ipa bisan nan baurang sumando tampek ambo maantakan sambah. Indak taatok tabilang gala jo sambah ambo muliakan. Alah bulek kato dek mupakaik, bulek aia dek pambuluah diambo tabik pasambahan.
Ma, St.Alamsyah, dihari nan kapatang dek sipangka alah disuruah disarayo anak mudo nan capek kaki nan ringan tangan, manyampaikan kaba baiak ko. Nan jauah alah bajalang, nan dakek alah bajapuik. Dan iyo pulo dihari nan sahari nangko, janjang nan alah batingkek, bandua nan alah batapuak, duduak ditangah rumah nangko. Saiyo pulo dek si pangka, alah bananti jo hedangan nan katangah. Kok sumbayang dibari bawakatu, kok makan dibari bakutiko, alah tibo pulo kutiko makan, mintak diparenai juadah nan katangah. Kan iyo baitu , Sutan?"
 (St.Mangkuto mengulang apa yang disampaikan oleh St.Alamsyah tadi sesuai dengan apa yang difahaminya dan meminta pembenaran dari St.Alamsyah. Pengulangan ini tidak mutlak harus sama bunyinya, tetapi disinilah seseorang yang mengetahui lebih banyak bunga kata, akan mengulangi penyampaian dari sipangka dengan variasi ucapan yang berbeda tetapi intinya sama Dan ini memperlihatkan pula kelihaian seseorang dalam acara sambah manyambah ini.)
St.Alamsyah : " sabananyo tu Sutan"
St. Mangkuto : " Ma St. Alamsyah. Sapanjang panitahan dari Sutan tadi, alah dalam
adaik nan bapakai, dalam cupak nan baisi.. Tapi sungguahpun baitu, dek lamak siriah lega carano, lamak kato lega bunyi, elok kato dek mupakaik. Dek karano kami disabalah kamari ko ado baniniak jo mamak, ado baduo batigo pulo, kok ambo elo sabanta ambo bao bamupakaik lai koh dalam adaik tu Sutan?"
St.Alamsyah : " Alah sampai tu, Sutan"
St.Mangkuto : " Sakiro-kiro, Sutan"
St.Alamsyah : " Angku St.Mangkuto. Iyolah di angku bapakaikan bana kato urang tuo
-tuo, kato surang babuleki, kato basamo bapaiokan. Sabana-bananyo tuh Sutan. Pailah Sutan jo parundingan ambo disiko tagak jo panantian".
 (St.Mangkuto tidak mau memutuskan apa yang harus menjadi jawabannya sebagai wakil dari si alek. Walaupun dia sudah mendapat mandat sebagai wakil si alek, namun untuk memutuskan jawabannya St.Mangkuto meminta waktu sebentar ke St.Alamsyah untuk bermusyawarah dengan si alek yang lain. Cara bermusyawarah untuk ini di Koto Gadang biasanya dilakukan hanya dengan memperbincangkan dengan orang disekitar St.Mangkuto saja. Di kampung lain di Kab. Agam, yang pernah kami hadiri, pembicaraan tentang mintak pendapat dari yang lain inipun dilakukan dengan melakukan sambah manyambah lagi dengan salah seorang dari si alek di kelompok yang lain. Begitu dapat kata sesuai dari si alek yang lain St.Mangkuto kembali menyapa St.Alamsyah).
St.Mangkuto : " Ma St.Alamsyah. Dihari nan tadi mintak waktu ambo sasaat sakutiko
untuak mampaio mampatidokan apo nan disampaikan dek silang nan bapangka karajo nan bapokok tadi. Pandang jauah nan balayangkan, pandang dakek nan batukiakkan, iyolah dihedangan nan katangah.
Kok balaia nak sampai kapulau, kok bajalan nak sampai ka bateh. Kan baitu bana tu Sutan? Iyo pulo, alah dapek pulo dek ambo kato nan saiyo, kok dimuloi dek sipangka nak kami turuikkan dibalakang. Sakian sambah, bakeh Sutan".
St.Alamsyah : " Ma St.Mangkuto. Dihari nan tadi angku mintak janji sasaat sakutiko
untuak mampaio mampatidokan nan disampaikan dek sipangka. Samuntalah pulo, io alah dapek pulo rundiang nan saukua, kato nan saiyo, tantangan hedangan nan katangah, dimuloi dek sipangka dituruikkan dek si alek. Kan iyo baitu bana tu Sutan?"
St.Mangkuto : " Iyo, sabana-bananyo tu Sutan".
St.Alamsyah : " Indak baitu doh Sutan, indak badaulu bakudian doh. Basamo-samo
kito mulai jo Bismillah. Nan awak, baparantian kito Sutan?"
St.Mangkuto : " Kok baitu kandak Sutan, iyolah awak muloi jo
Bismillaahirrahmaanirrahiim.. Rancak baparantian kito Sutan."
 Selesailah sambah manyambah dalam mempersilakan makan. Dan para tetamupun menikmati hidangan yang telah tersedia, namun marapulai hanya duduk saja menyaksikan orang makan. Tidak diadatkan marapulai makan pada acara mengantar marapulai ini.
Pada kesempatan yang akan datang akan disampaikan acara sambah manyambah minta diri sesudah selesai makan.